Саяхан миний бие Чүсок буюу ургацын баярын өмнөхөн БНСУ руу найман жилийн дараа дахин зорчсон бөгөөд Солонгосын хил гаалийнхан хэрхэн монголчуудад хандаж буй талаар энд мэдээлэхийг хүслээ. Ерөнхийдөө хилийн шалган нэвтрүүлэх дээр урьд өмнө манайхныг Цагаачлалын албанд бүртгэж бөөн сүр дуулиан болдог байсан бол энэ удаа тэгсэнгүй. Тэр ч бүү хэл, ганц ч асуулт тавилгүй гарын хоёр хурууны хээг зургийн хамт авснаар Солонгос руу орох ногоон гэрэл асав. Чингээд ачаа тээшээ авах гэж байтал энд тэндгүй дуут дохио хангинаж учрыг тодруулбал, тэндхийн нэгэн “гаалийн ажилтан” жижигхэн нохой хүмүүсийн ачаа тээшийг үнэрлэж хориотой зүйл байгаа эсэхийг дор нь эзэндээ мэдэгдсэнээр ийнхүү гаалийнхны нарийвчилсан шалгалтанд орох шаардлагатай тулгарч байсан хүн олон байсныг дурдах хэрэгтэй. Тэдгээр хүмүүсийн цүнх, савыг байдгаар нь онгичиж, монгол хиам, ааруул, утсан мах, борц, янз бүрийн гялгар цаасаар далдалж боосон хүнсний бүтээгдэхүүн, жүүсний саванд хийсэн шууз зэргийг ямар ч өршөөлгүй төмөр сав руугаа хаяж байлаа. Байдлыг сонирхвол, тэнд нэгэн босоо самбар өлгөөтэй байх агаад дээрх хориотой зүйлсийг оруулж ирсэн тохиолдолд таван сая вонн /6 сая орчим төгрөг/-оор торгоно гэж бичсэн байв.