Латви улс дайны байдалтай байгаа Украин улсад дотоодын нийт бүтээгдэхүүнийхээ 0.25 хувьтай тэнцэх хэмжээний цэргийн дэмжлэгийг жил бүр олгох аюулгүй байдлын гэрээ байгуулжээ.
Энэ тухай Украины ерөнхийлөгч Володимир Зеленський нийгмийн сүлжээгээр дамжуулан мэдэгдсэн ба Латвийн ерөнхийлөгчтэй хоёр талын аюулгүй байдлын гэрээнд гарын үсэг зурсан гэдгээ мөн энэ үеэр цохон тэмдэглэсэн байна.
Латви улс энэхүү шийдвэрийнхээ хүрээнд санхүүгийн дэмжлэг үзүүлэхээс гадна 10 жилийн хугацаанд цахим орчны аюулгүй байдлыг хангаж, мина устгах, нисгэгчгүй нисэх технологийг дэмжин ажиллах ба Украиныг НАТО-д элсэхэд туслах аж.
Ерөнхийлөгч Зеленський сүүлийн үед Балтийн тэнгис, Хар тэнгис, Адриатын тэнгисийн хөрш орнуудын зөвлөлдөх уулзалтад оролцож, агаарын довтолгооноос хамгаалах системийн дэмжлэг удаа дараа уриалсан билээ.
Украины дайн сунжирч буйн улмаас барууны орнуудын дэмжлэг багасаж байгаа энэ үед Украин улс зарим улс орнуудтай бие даасан аюулгүй байдлын гэрээ байгуулан зэвсэг, санхүүгийн дэмжлэг авч эхлээд байгаа юм.
Энэ оны нэгдүгээр сард Их Британиас эхлээд Герман, Франц, Итали, Канад, Нидерланд, Финланд, Дани улсууд аюулгүй байдлын гэрээ байгуулж, Украинд дэмжлэг үзүүлэхээ амласан байна.
Эх сурвалж: YTN