Баасан гарагт ТАСС мэдээллийн агентлагаас мэдээлснээр Европ тивд байгалийн хийн фьючерсийн үнэ өсжээ. Улмаар 1,000 шоо метр байгалийн хийн арваннэгдүгээр сарын фьючерсийн үнэ 610 ам.доллар болсон байна. Энэ нь Европ тив дэх байгалийн хийн хувьд өнгөрөгч хоёрдугаар сарын дунд үеэс хойш бүртгэгдээгүй өндөр үнэ ажээ.
Тийнхүү ТАСС мэдээллийн агентлагаас мэдээлсэн дагуу Нидерландын TTF бирж дээр байгалийн хийн арваннэгдүгээр сарын фьючерсийн үнэ 1,000 шоо метрт 600 ам.долларыг давснаар Европт 1 мегаватт цаг эрчим хүчний үнэлгээ 56.01 еврод хүрэх төлөвтэй болсон гэнэ.
Байгалийн хийн үнэ ийн өсөх болсон шалтгааныг ТАСС агентлагаас тайлбарласнаар Австрали улс дахь Chevron шингэрүүлсэн байгалийн хийн станцын ажилтнууд дахин ажил хаяж магадгүй нөхцөл үүсэж, Израиль дахь Тамарын байгалийн хийн олборлолтыг зогсоосонтой холбоотой гэжээ.
Эх сурвалж: ТАСС