ОХУ Хар тэнгисийн үр тарианы гэрээнээс гарсны улмаас тасалдаад буй үр тарианы экспортыг үргэлжлүүлэхийн тулд Украин улс Хорватын боомтуудыг ашиглахаар төлөвлөж байгаа аж.

France24 болон Reuters агентлагуудын орон нутгийн цагаар 31-ний өдөр мэдээлснээр, Украины Гадаад харилцааны сайд Дмитрий Кулева мөн өдөр Хорватын Гадаад харилцааны сайд Гордан Грилич Радмантай уулзалт хийх үеэрээ Украины үр тарианы экспортод Хорватын боомтыг ашиглах боломжийн талаар хэлэлцсэн байна.

Дунай, Адриатын тэнгист байрлах боомтуудаар дамжих төлөвтэй байгаа аж.

"Бид юуны түрүүнд энэ боомтуудад хүрэх хамгийн үр ашигтай замыг бий болгож, олдсон боломжоо бүрэн ашиглахын төлөө хичээнгүйлэн ажиллах болно. Экспортын замыг боломж бололцоогоо ашиглан нээснээр дэлхийн хүнсний аюулгүй байдалд бага ч болов хувь нэмрээ оруулж буй хэрэг юм” хэмээн Кулева хэлэв.

Оросын тал энэ сарын дундуур Хар тэнгисийн үр тарианы хэлэлцээрийг орхиж байгаагаа мэдэгдсэн билээ. Тэгвэл үүнтэй холбогдуулан Украины тал үр тариа экспортлохдоо Европын холбоогоор дамжин өнгөрөх хуурай зам болон Дунай боомт Лени, Измайл зэрэг өөр боомтуудад ихээхэн найдаж байсан юм.

Гэвч Оросын арми саяхан нисгэгчгүй нисэх төхөөрөмж ашиглан Рени, Измайл боомтуудын дэд бүтэц, үр тарианы агуулахуудыг устгаад байгаа билээ.

Эх сурвалж: Newsis